هنا
و....هناك
بنحاول نعلم التلاميذ انهم يحافظوا علي
نظافة المكان فوفرنالهم سلة في كل فصل وسلة مربوطة علي كل شجرة في الحوش لكن
الاولاد مصرين علي انهم يرموا الورق علي الارض حتي اللي بيروح يرميها في السلة
ومتجيش فيها مبيكلفش نفسة انه يشيلها تاني ويحطها في السلة والنتيجة تلاقي السلة
فاضية واكوام الورق حواليها نصحناهم بالحسني مفيش فايدة والضرب برضه مفيش فايدة
بقت المديرة توطي تشيل الورقة بنفسها علشان الاولاد يشوفوها ويقتدوا بها ولا كأنها
عملت حاجة دا ممكن تلاقيهم بيرموا الورقة مخصوص علشان تشيلها هي. وتكون المدرسة
مننا قاعدة في الفصل وتلاقي الولد بيحدف الورقة من الشباك ال يعني علشان ميوسخش
الفصل وكأن الغرض نظافة الفصل بس مش النضافة العامة أوكأنه لو حطها في السلة اللي
في الفصل كده هيوسخ الفصل.
من المواقف الطريفة اللي حصلتلي مرة في طابور
بعد الفسحة الولد كان لسه بياكل في كيس شيبسي فقلتله لما تخلصله مترميش الكيس هنا –
اقصد انه يرميه في السلة- ورد الولد بأدب "حاضر يا ابلة" لكن بعد ما خلص
لقيته رماه علي الارض بس بعيد شوية عنه فبصيتله وقلتله انا مش قلتلك مترميش الكيس "هنا"
فرد بكل براءة وهو بيشاور جنبه "انا مرميتهوش (هنا)" وكمل وهو بيشاور ناحية
الكيس البعيد شوية "انا رميته (هناك)"
الحقيقة المشكلة دي حلها مش في ايدينا احنا بس - وان كان لينا الدور الاعظم- لكن كمان الاسرة والطفل نفسه
والمجتمع اللي حواليه لازم يتعاونوا في حلها زي ما لازم يتعاونوا في حل المشاكل
التانية اللي مش ممكن تتحل الا بتعاون كل الاطراف المسببة للمشكلة نفسها.
تربية الطفل بتكون من البيت ومن الصغر ايضا
ردحذفالطفل ف بيته لو سلوكه صحيح ووالديه بيرشدوه للسلوك الصح ده
فى المدرسه هيقتدى بنفس السلوك ولو فى المدرسه عملو حصه للأخلاقيات بدل بعض الحصص الى ملهاش لازمه بدل اتنين العاب يبقى واحده العاب وواحده للأخلاق ويكون عقاب الطفل مش بالضرب إنما إنه لو رمى ورقه على الأرض يشيل كل الورق الى فى المكان المره الى بعدها هياخد باله إنه لازم يرمى فى السله
مدونة جميلة ومميزه
تحياتى
اولا شكرا علي مرورك الكريم وكلامك الجميل
ردحذفثانيا انا متفقة مع حضرتك ان التربية بتبدأ من الاسرة لان الطفل بيدخل المدرسة وهو عنده ست سنين يعني بيكون اتعلم سلوكيات كتير وصعب تتغير وان لم يكن مستحيل اذا اتبعنا الاسلوب الصح اما حصة الاخلاق ففي زيها في اليابان وانا فاكرة اني وانا في الثانوي كان اولاد اختي اللي في الابتدائي عندهم كتاب اسمه القيم والاخلاق يعني اكيد كان ليه حصة علي الاقل بيدرس فيها وكان الكتاب فيه قصص بتعلم الاولاد الاخلاق والسلوك الصحيح بس الكتاب ده اتلغي بعدها بسنة تقريبا - يظهر انهم لقوا الاولاد بقي عندهم اخلاق ومبقوش محتاجينه - لكننا كمعلمين بنربي اجيال بنستغل مواقف بتحصل ومن خلالها بنحاول نعلم الاولاد خلق او سلوك معين.